Nógvir av teimum somu fáa afturval

Teir 22, sum eru tiknir út til fótbóltslandsliðið við monnum til dystirnar ímóti Eysturríki og Skotlandi, vóru eisini við seinast. Ein spælari skal takast út afturat

Bjarni Rubeksen

Eli Hentze kunngjørdi A-landsliðshópin hjá Føroyum í dag

Símun Christian Olsen

27.09.2021 - 15:15

Fáar broytingar eru á landsliðnum í fótbólti, sum er tikið út til HM-undankappingardystirnar ímóti Eysturríki og Skotlandi í oktober.

Allir 22, sum stóðu á listanum, sum Eli Hentze, hjálparvenjari, kunngjørdi í dag, vóru við til dystirnar ímóti Ísrael, Danmark og Moldova fyrr í september.

Ein spælari skal undir øllum umstøðum takast út afturat í hesi vikuni. Bíða verður eftir, um smáskaddu Jákup B. Andreasen ella Heðin Hansen verða tøkir.

- So tað verður bíða eftir at vita um ein spælari til seksaraplássið verður tøkur. Um ikki, mugu vit rokera eitt sindur, men 23 spælarar verða tiknir út, sigur Eli Hentze.