Tingfólk fáa hvør sína skrivstovu

Landsverk fer út í januar og Mentamálaráðið skal út í august. Tingfólk skulu í staðin inn í húsini hjá Havnar Arbeiðarafelag beint við síðurnar av løgtingsumsitingini á Tinghúsvegnum í Havn.

Jógvan á Lakjuni, sum er løgtingsformaður til í ovurmorgin, heldur, at løgtingsfólk í alt ov langa tíð hava havt ov vánaligar arbeiðsumstøður. Tí hevur hann undirskriva nýggju leigavtaluna.

Men nú vera umstøðurnar altso nógv betri. Nýggja leigumálið hjá løgtinginum er 2.640 fermetrar. Til samanberingar er Gamla apotek minni enn 400 fermetrar.

Tað kostar sjálvsagt at geva tingfólkunum betri sømdir. Leiga og rakstur kosta 3,3 milliónir krónur um árið. Og so skulu pengar eisini brúkast til umbyggingar, men tað er ikki greitt enn, hvussu umfatandi hetta verður. Jógvan á Lakjuni heldur tó, at tað er vert at brúka hesar pengarnar uppá tingarbeiði.

Løgtingið yvirtók leigumálið í juli. Í næstum fer Løgtingsumsitingin at fyrireika, hvussu bygningurin skal innrættast, og so er vónin at flyta inn í heyst, um alt gongur sum ætlað og neyðugu pengarnir verða játtaðir, upplýsir Jonhard Klettheyggj, løgtingsstjóri.