Inniróður: Væl nøgd við sesongina

Venjarin í inniróðri fegnast um avrikini hjá landsliðnum í vetur, seinast í HM í Toronto.

 - Vit vóru við í 11 kappingum og fingu níggju heiðursmerki heim við, umframt at vit fingu nøkur ótrúliga góð avrik, so eg haldi, at tað føroyska landsliðið í inniróðri er komið fyri at vera, sigur Sarita Kristina Hansen, sum varð sett sum landsliðsvenjari í heyst.

Endabresturin hjá innróðrinum var um vikuskiftið, tá gott hundrað rógvarar - ung og gomul - kappaðust um føroyameistaraheitið á Oyrabakka. Landsliðsvenjarin heldur, at fleiri góðir rógvarar eru á veg.
 
 - Framtíðin er ógvuliga bjørt, og eg fegnist um at síggja, at tey stilla upp til kappingar, og eg síggi, at fleiri av teimum, sum hava verið við í bruttohópinum, hava gjørt framstig og vísa flagg, sigur Sarita Kristina Hansen.

Eisini í Róðrarsambandinum eru tey væl nøgd við innisesongina.

 - Hetta var fjórða í síðsta kapping, og luttøkan hevur verið góð og umleið hin sama, sum í fjør, sigur Petur Hansen úr RSF.

 - Vit hava fingið fleiri heimsmeistarar, og børnini kappaðust um DM, har tey fingu góð úrslit - summi blivu meistarar har - so alt í alt hevur tað verið gott.