A-landsliðið: Seinastu fyrireikingarnar í Chișinău

Er Mathias Lamhauge eitt vet spentari enn hinir á føroyska landsliðnum, hoyrist tað ikki á honum.

Í morgin spælir B36-málverjin sín fyrsta undankappingardyst fyri Føroyar, men hann tykist hava tamarhald á kenslunum.

 - Onkursvegna roynir tú at gera teg eins kláran til allar dystirnar, sigur Mathias Lamhauge, sum hevur spælt venjingardystir fyri Føroyar ímóti Liktinstein og Kosovo.

 - Tað er framvegis ein fótbóltsdystur, mást tú minnast til, og tú gert títt besta við at gera teg so kláran sum gjørligt, sigur málverjin.

Føstu málverjarnir síðstu nógvu árini, Gunnar Nielsen og Teitur Matras Gestsson, er ikki tøkir. Gunnar Nielsen umhugsar sína fótbóltsframtíð, meðan Teitur Matras Gestsson júst er vorðin pápi fyri fjórðu ferð og gav avboð.

Tí hevur landsliðsvenjarin, Håkan Ericson, ikki stórvegis val. Afturat Mathiasi Lamhauge hevur hann Bárð á Reynatrøð og Bjarta Vitalis Mørk, og tá telja landsliðsroyndirnar hjá B36-málverjanum, sum hevur verið longst í landsliðshópinum, nógv.

 - Hann fekk boðini tíðliga, so hann kann fyrireika seg, og hann fær allan tann stuðul, sum hann vil hava, men hann tykist sera sinniligur og róligur, og eg haldi, at Mathias hevur ment seg nógv í hálvtannað ár, sigur Håkan Ericson.

EM-undankappingardysturin ímóti Moldova verður klokkan 19.45 í morgin, og Kringvarpið sendir dystin eftir Dag og Viku.