Elias á Skipagøtu: Hetta er fantastiskt

 - Hetta er fantastiskt.

Tað segði føroyski spælskiparin, Elias á Skipagøtu, eftir sigurin hjá føroyska U21-hondbóltslandsliðnum á Brasil, sum tryggjaði Føroyum pláss í fjórðingsfinalunum.

Spælskiparin tók stóra ábyrgd í føroyska álopsspælinum, og við sínum 13 málum var hann størsta einstaka orsøkin til, at tað eydnaðist at vinna á Brasil.

 - Tá vit sóu, at Portugal vann á Spania, vistu vit, at vit høvdu ein stóran kjans at klára tað, og heldigvís vunnu vit, segði Elias á Skipagøtu eftir dystin.

Víðari luttøkan er tryggjað, og í morgin spæla Føroyar bólkafinalu ímóti Portugal. Enn er ikki vist, um Elias á Skipagøtu verður við, ella um venjararnir fara at spara føroysku stjørnuna.