Lønargjógvin breiðkast

Eftir eitt hart verkfall í góðar seks vikur skrivaðu Felagið Føroyskir Sjúkrarøktarfrøðingar og lønardeildin hjá Fíggjarmálaráðnum undir nýggjan sáttmála, 14. november í fjør. Semjan gav lønarhækkan á 3,8% fyrsta árið, 4,04% annað árið og 2,15% triðja árið, sum byrjar 1.januar 2025. 

Síðani gekk skjótt - eitt fyri og annað eftir skrivaðu hini fakfeløgini undir nýggjar sáttmálar við Fíggjarmálaráðið. Men tað er munur á, hvat ymsu feløgini fáa burturúr. Sjúkrarøktarfrøðingarnir fingu sum nevnt 2,15% oman á lønina 3. árið. Men onnur feløg fingu 4,75%. 

Endalønin hjá einum sjúkrarøktarfrøðingi hækkar 3786 kr/mdr í sáttmálatíðarskeiðnum. Endalønin hjá einum lærara í fólkaskúlanum hækkar 4896 kr/mdr. Í BLF-sáttmálanum hækkar endalønin hjá einum fulltrúa við 4 ára útbúgving 5860 kr/mdr. Og Tænastumannafelagið fær somu lønarhækkan. Tað merkir eittnú, at lønin hjá einum landsstýrisfólki hækkar góðar 10.000 kr/mdr í sáttmálatíðarskeiðnum

Ruth Vang, landsstýriskvinna í fíggjarmálum, var gestur í sjónvarpsstovuni.