Heimsins størsta helli er í Hesti

"Síðani 2018 hava vit fortalt, at Klæmintsgjógv møguliga er heimsins størsta helli, tí tað helt Magni Laksafoss, sum var farin undir at skráseta holir", fortelur Sigmund Signason, sum eigur fyritøkuna Rib62. 

Og nú er staðfest, at Klæmintsgjógv er heimsins størsta helli. 

Higartil hevur eitt helli í Nýsælandi havt metið, men mikudagin vóru 3D-skanningar gjørdar í Hesti, og greitt var, at talan er um eitt nýtt heimsmet. 

Rikoriko í Nýsælandi er 221.494 rúmmetrar, men sambært skanningini er Klæmintsgjógv umleið sjey túsind rúmetrar størri og undir vatninum er tað umleið 50.000 rúmetrar størri.

Henry Henderson-Genefaas, tekniskur serfrøðingur, gjørdi skanningina. Aftrat honum vóru Gethin Wyn Roberts, sum er dátuserfrøðingur á Umhvørvisstovuni og Anne Marie Berg Norby, sum er uppmátari á Landsverki.