Árni Frederiksberg: "Vit fáa ov løtt mál ímóti okkum"

KÍ vann í gjárkvøldið 3-2 við Djúpumýru móti svenska meistaraliðnum Malmö FF í seinna dystinum í royndini at vinna seg í Champions League-bólkaspælið. 

Sigurin var tó ikki nóg mikið hjá KÍ, sum tapti fyrra dystin í Malmö 1-4. Samanlagt gjørdist úrslitið 6-4 til Malmö FF. 

Nú skal KÍ royna at vinna seg í bólkaspælið til næstbestu evropisku fótbóltskappingini, Europa League. 

Árni Frederiksberg, sum við tveimum málum í gjárkvøldið nú er mest skorandi føroyski leikarin í evropiskum fótbólti, iðraði seg um, at tað ikki eydnaðist at vinna samanlagt móti svium.