Jesper Jensen: - Vit gleða okkum at spæla ímóti "lítlusystur"

Danmark gleðir seg at spæla ímóti Føroyum í síðsta umfari av bólkaspælinum, sum verður í morgin. Tað sigur venjarin, Jesper Jensen, sum stendur á odda fyri danska liðnum triðja EM-endaspælið í rað.

 - Vit gleða okkum at spæla ímóti "lítlusystur", og finna útav, hvussu langt tær eru komnar. Eg haldi, at tær hava staðið seg væl í EM, sigur danski venjarin.

Jesper Jensen avdúkar, at onkur spælari hjá Danmark, sum hevur spælt nógv higartil, kanska fær eitt sindur av hvíld á beinkinum í morgin. 

 - Vit taka uppgávuna í fullum álvara. Vit hava spælt okkum víðari, men hinvegin hava vit eisini so nógvar dugnaligar spælarar, at líkamikið hvør er inni, fara vit at spæla á høgum stigi, sigur Jesper Jensen, sum nevnir Janu Mittún, Súnu Krossteig Hansen og Pernille Brandenborg sum vandamiklar spælarar hjá Føroyum.