Savnaðust um judo í Vági

Samanhald og felagsskapur var ovast á dagskránni, tá smáir 90 íðkarar úr øllum landinum hittust á judolegu í Vági um vikuskiftið.

Spaniólin David Flecha stóð á odda fyri teimum mongu venjingunum frá fríggjadegi til sunnudag. Hann hevur 20 ára royndir sum venjari kring heimin, og sum íðkari fekk hann nógv góð úrslit við spanska landsliðnum.

 - Eg vil fegin geva av mínum eldhuga fyri judo. Vit hava vant í trimum bólkum hesar dagarnar, har eg síggi, hvussu fólk lurta og taka ímóti tí, sum eg komi við, segði David Flecha.

 - Eg vóni, at fáa lært eitt sindur frá mær um tekniskt judo, men viðhvørt kemur tú fyri at undirvísa, men í roynd og veru fært tú minst líka nógv aftur. Nýggjan íblástur um judo ella um lívið, segði venjarin.

Legan er stuðlað av breiddarpuljuni hjá Ítróttasambandi Føroya, sum kom í 2024 og sum stuðlar tiltøkum har megintátturin er menning, sosial samvera og felagsskapur í breiðasta høpi.