Nær við at vit settu okkum á dystin

Claus Mogensen iðraði seg um, at tað ikki eydnaðist at vinna HM-dystin ímóti Serbia í Dortmund hósdagin.

Eina løtu ímóti endanum sá út til, at dysturin ímóti stóru serbunum fór at koppa til Føroyar, men einstøk mistøk og brendir kjansir merktu, at tað ístaðin gjørdist 31-31 javnleikur í evstu løtu.

Enn eitt flott úrslit til føroysku kvinnurnar, men eisini eitt stig, sum merkti, at fjórðingsfinaludreymurin brast.

 - Tað hevði verið eitt órealistiskt mál frá byrjan, og tí hava vit ikki hugsað stórvegis um tað, men vit gjørdu alt fyri at vinna í dag og soleiðis varðveita kjansin, segði venjarin, sum hevði blandaðar kenslur.

 - Vit eru jú við at seta okkum á dystin, tá fimm minuttir eru eftir, men vit bardust ímóti okkara egnu mistøkum, og spælararnir eiga stórt rós fyri at eitt stig kemur burturúr, segði Claus Mogensen.

Føroyar hava ein dyst ímóti Íslandi eftir, og venjarin vil sera fegin seta eitt ordiligt punktum fyri hesa hendingarríku HM-kappingina, sum føroysku kvinnurnar siga farvæl við leygarkvøldið.

 - Har vilja vit fegin hava ein sigur afturat. Tað hevði verið fantastiskt, um vit enda við bert tveimum tapum. Tað hevði verið frálíkt, segði venjarin.