Venjarin: Hetta er eitt risaúrslit

 - Hetta er eitt risaúrslit. Hetta er eitt risaúrslit!

Peter Bredsdorff- Larsen endurtók orðini fyri líkasum at gera tað púra greitt. 

Tað mundi kortini ikki vera neyðugt. Tey túsundtals viðhaldsfólkini í Unity Arena vistu tað. Øll heima í Føroyum vistu tað. Føroyar høvdu tryggjað sær sín fyrsta EM-sigur og ikki bara tað. Dysturin ímóti Montenegro endaði 37-24 til Føroyar.

 - Vit vistu, at vit fóru at fáa betri møguleika at spæla okkara álopsspæl í dag, og vit vistu, at vit fóru at spæla ein góðan dyst í verjuni. Og tað er feitt, at tað eydnast, staðfesti venjarin.