Undan steypafinalunum: VÍF kann ikki dúva so nógv upp á Fríðu Nolsøe Olsen

Bert fýra spælarar hjá VÍF skutu mál í seinnu hálvfinaluni ímóti Neistanum sunnudagin. 

Av teimum 25 málunum tilsamans skeyt bakspælarin Fríða Nolsøe Olsen heili 13. Av hesum vóru átta tey seinastu hjá heimaliðnum.

Sigast kann tí, at hon dróg vestmenningar í steypafinaluna, men VÍF kann ikki dúva eins nógv upp á skjúttan leygardagin ímóti Kyndli, heldur hondbóltsviðmerkjarin Sjúrður Hildarson Hoydal.

 - VÍF var fyrsta liðið, sum vísti, at Kyndil kann argast, tá tær spældu 30-30 í Vestmanna, og tað kunnu tær finna sín ugga í. Eg trúgvi, at VÍF skal raka eitt hægri stig, enn tær gjørdu ímóti Neistanum. Tær kunnu ikki dúva upp á, at Fríða skal skora átta mál á rað og draga tær allan vegin í land tá, segði Sjúrður Hildarson Hoydal í 3-2 mánakvøldið.

Mugu steðga Turið

Fyrsta fyritreyt, um VÍF skal steðga Kyndli, er at fáa bilbugt við Turið Arge Samuelsen. Bakkurin skeyt 25 mál tilsamans í hálvfinalunum ímóti H71, og hon skal haldast niðri, um vestmenningar skulu hava nakran kjans. Tað er kortini bara fyrsti partur av setninginum, helt hondbóltsviðmerkjarin.

 - Í hesum dystinum, sum endaði við javnleiki í Vestmanna, skoraði Turið eini tvey mál, og so kann tað hava sínar orsøkir. Tú má steðga Turið, men tað vísir seg, at tú kanst ikki bara royna at steðga Turið, tí har eru aðrar, sum taka yvir, og bóltarnir verða beindir aðrar leiðir. Millum annað inn til Bjartu, segði Sjúrður Hildarson Hoydal.

Steypafinalan Kyndil - Neistin, hondbóltur

Frítekst tagging: 

Steypafinalan Kyndil - Neistin

Hondbóltur

HSF – Hondbóltssamband Føroya

Bjarni Árting Rubeksen

Steypafinalurnar verða vístar beinleiðis í sjónvarpinum hjá Kringvarpinum. Byrjað verður at senda frá dystinum við kvinnum millum VÍF og Kyndil klokkan 16.30.