Aksel við Beinir: "Brúka lyklarnar til Tinganes at halda dyrnar opnar"

"Eg haldi meg vita, at tú kemur av góðari ætt," segði Aksel V. Johannesen, fyrrverandi løgmaður, skemtandi, tá hann handaði bróðursoninum, Beinir Johannesen, løgmanni, lyklarnar til Tinganes. 

"Orðafellið sigur, at gott er at hava keisaran til móðurbróður. Eg haldi, at í dag kann eg siga, at gott er at hava bróðursonin sum løgmann."

Aksel V. Johannesen byrjaði við at takka fráfarandi landsstýrisfólkunum fyri arbeiðið, áðrenn hann handaði bróðursoninum lyklarnar til Tinganes. 

"Lyklarnir kunnu brúkast til at læsa við og at lata upp við. Mítt ráð til tín vil vera at brúka lyklarnar at lata upp við heldur enn at læsa onkran úti við."

Beinir Johannesen, løgmaður, takkaði Akseli V. Johannesen fyri hansara tíð sum løgmaður, og hann fegnaðist um, at Aksel V. Johannesen nú verður partur av landsstýrinum.