Goalball í gongd: - Stóran týdning fyri ítróttagreinina

Fyrsti veruligi dysturin í goalball varð spældur síðsta vikuskifti, tá eitt føroyskt lið tók ímóti einum norskum liði í Fuglafirði.

Goalball er ítróttur fyri sjónveik og blind, men eisini fólk við fullari sjón kunnu spæla.

 - Hetta hevur stóran týdning. Tá tú trenar til dagligt og hvørja viku, er hetta heilt vist nakað, sum tú hyggur fram ímóti, og tað ger tað uppaftur størri, at tað er á heimavølli, segði samskiparin, venjarin og spælarin, Anja Christensen.

Hon hevur skipað fyri goalball-venjingum seinastu árini, og nú eru eini fimm, sum venja regluliga. Ein av teimum er Rúna Durhuus, og hon er glaðst fyri samanhaldið.

 - Tú spælir ikki allatíð, men tú hevur pausur og prátar. Og mær dámar væl at røra meg, sigur hon.

Parasport Føroya fegnast eisini um, at eitt tilboð um at íðka goalball er, og vónar at uppaftur fleiri fara at royna stuttligu ítróttagreinina.

 - Eg havi roynt fleiri ferðir, at fáa fólk at spæla goalball, men so kom Anja, og hon hevur drivið tað sjálv tey seinastu tvey ella trý árini, og tað eru vit øgiiga glað fyri. Vit hopa, at fleiri vilja koma at royna, í hvussu er, segði Tróndur Ravnsfjall úr Parasport Føroyum.

Norðmenn vunnu, men føroyingarnir vóru kortini væl nøgdir við javna dystin og vikuskiftið saman við norska liðnum.