Arbeiðara- og lønarbanki skal setast á stovn

Tíðin er búgvin til, at ein arbeiðara- ella lønarbanki verður settur á stovn í Føroyum.

Tað sigur Súni Selfoss, formaður í Starvsfelagnum, í kjalarvørrinum av, at Bank Nordik í gjár kunngjørdi, at fleiri tænastugjøld hækka.

Millum annað hækkar útgjald við kassan úr 25 krónum upp í 50 krónur, og ein røð av flytingum, sum fólk sjálvi gera á netbankanum, dýrka.

Men nú er nokk, sigur formaðurin í Starvsfelagnum.

Føroysku bankarnir eru undirlagdir ymisk krøv frá myndugleikunum, ið eru kostnaðarmikil. Men tey kunnu fíggjast við einum lægri vinningsbýti, heldur Súni Selfoss.

Fleiri av arbeiðarafeløgunum eru longu saman um pensjónsfelagið LÍV. Og júst tað samstarvið kann vera útgangsstøði fyri einum nýggjum banka, heldur formaðurin í Starvsfelagnum.

Higartil hevur undirtøka ikki verið fyri einum arbeiðara- ella lønarbanka, men nú er man komin har til, at okkurt má gerast, sigur Súni Selfoss.

HOYR SAMRØÐUNA VIÐ SÚNA SELFOSS, FORMANN Í STARVSFELAGNUM.