Eingin skylda at boða frá eftirlitsavgerðum

Heilsufrøðiliga Starvsstovan hevur eftirlit við umleið 200 veitarum av mati í Føroyum. Higartil í ár hevur eftirlitið verið á gátt hjá 43 veitarum. Av teimum eru tað fleiri, har eftirlitið hevur stongt virksemið á staðnum, tí mett hevur verið, at matvørutrygdin ikki er nøktandi.

Higartil í ár eru 5 til 6 matstøð stongd av vantandi matvørutrygd. Tað sigur Elma á Geilini Ortind, eftirlitsfólk á Matvørudeildini hjá Heilsufrøðiligu starvsstovuni.

- Um vit hyggja leystliga eftir tí, so eru tað nokk um 5-6 støð, sum eru stongd á staðnum við boðum um, at tað ikki ber til at lata upp aftur, fyrr enn ávís viðurskifti eru fingin í rætt lag, sigur Elma á Geilini Ortind. 

Matstovur vera einans stongdar, tá matvørutrygdin er í vanda og ikki kann garanterast. Tað, at matvørutrygdin er í vanda, merkir, at maturin er dálkaður, ella at kundin kann gerast sjúkur av matinum, millum annað um reinføri er ov vánaligt. 

- Tað er eitt sera ógvusligt inntriv, og tað verður einans tikið, tá tað verður mett neyðugt, sigur Elma á Geilini Ortind. 

Men einasti mátin, sum ein brúkari kann vita, um ein matstova hevur verið stongd av Heilsufrøðiligu Starvsstovuni, er við at søkja um alment innlit.

- Úrslitini av eftirlitskanningunum verða ikki almannakunngjørd. Tað hava vit hvørki heimild ella skyldu til at gera, sigur Elma á Geilini Ortind.