Russar spyrja norðmenn um Svalbard

Í ár eru 100 ár, síðani Svaldbard-sáttmálin varð undirskrivaður, og nú boða russiskir myndugleikar frá, at teir vilja hava Noreg at svara nøkrum spurningum um, hvussu Noreg umsitur Svaldbard-oyggjarnar.

Russiski uttanríkisráðharrin, Sergej Lavrov, hevur biðið norska uttanríkisráðharran, Ine Marie Eriksen Søreide, um fund.

Lavrov vil serliga tosa um viðurskifti í sambandi við, at Noreg hevur sett avmarkingar í verk fyri russisku tyrluferðsluni í Svaldbard, og at fleiri øki eru ásett at vera náttúruverndarøki, tí tað forðar vinnuligum virksemi har.

Eisini halda russar, at fiskiverndarøkið kring rundan um Svaldbard er ólógligt, stendur í fráboðanini frá russisku sendistovuni á Facebook.

Til Moskva í summar

Norska uttanríkisráðið váttar fyri VG, at tað hevur fingið bræv frá russiska uttanríkisráðnum um russiskt virksemi í Svaldbard. 

- Russar viðgera javnan sjónarmiðini, og norskir myndugleikar vita um tað. Alt virksemi í Svaldbard skal vera innan fyri norskar lógir og kunngerðir, sigur Audun Halvorsen, vararáðharri í uttanríkisráðnum.

Eftir ætlan skal Søreide á vitjan í Moskva seinni í ár, og tá fær Sergej Lavrov høvi at viðgera politisku spurningarnar um Svaldbard.

Norska uttanríkisráðið hevur ikki ásett enn, nær fundurin verður.