Bretar hótta við at slíta samráðingar við ES

Bretland ávarar ES um, at landið fer at slíta samráðingarnar um eina handilsavtalu í juni, um útlit ikki eru fyri eini loysn tá, skrivar BBC. 

Ætlanin hjá Bretlandi er at fáa eina fríhandilsavtalu í lag í ár, men stjórnin fer ikki at góðtaka, at ES-reglur skulu vera oman fyri bretska lóg.

 - Vit ætla ikki at handla okkara yvirvald burtur, sigur stjórnin. 

Bretar skal góðtaka ES-reglur

Í samráðingarupplegginum hjá ES verður róð framundir, at Bretland noyðist at góðtaka broytingar í ávísum ES-lógum, m.a. um almennan stuðul til vinnulívið.

Tað góðtekur bretska stjórnin ikki.

Í samráðingarupplegginum hjá Bretlandi stendur, at stjórnin fer ikki at gera nakra avtalu, sum hevur við sær, at landið missir tamarhaldið á egnum lógum.