- Tíðindi, mentan og ítróttur
Nýggj hjálpartiltøk í Danmark fyri 300 milliardir
![](https://kvf.fo/sites/default/files/styles/grein-ovasta-mynd/public/nicolai_wammen.png?itok=gggtCoAU)
Allir flokkar í fólkatinginum eru til reiðar at játta eina trísifraða milliardaupphædd at hjálpa danska vinnulívinum burtur úr koronakreppuni.
Tað varð upplýst á einum tíðindafundi fyrrapartin, har umboð fyri allar flokkar í fólkatinginum vóru við.
- Vit eru eisini til reiðar brúka meira pening, gerst tað neyðugt, segði Nicolai Wammen, fíggjarmálaráðharri.
Galdandi í tríggjar mánaðir
- Hetta er ein serlig støða, og átøkini eru galdandi í tríggjar mánaðir. Verða hesi stigini ikki tikin, verða túsundtals fólk arbeiðsleys, og fyritøkur lata aftur. Henda íløgan verður gjørd fyri at bjarga Danmark í einari sera torførari støðu, og eisini vælferðini í landinum, segði Nicolai Wammen, fíggjarmálaráðharri.
Hann segði, at danski búskapurin er væl fyri, og tí hevur landið ráð at seta tiltøkini í verk. Og ráð eru at brúka meira pengar, verður tað neyðugt.
Serfrøðingar hava sagt, at átøkini fara at kosta einar 300 milliardir kr.
- Vit vita ikki, hvussu nógv tey fara at kosta, men vit fara at hjálpa Danmark í hesi støðu, og vit gera tað í felag, segði Nicolai Wammen, fíggjarmálaráðharri, á tíðindafundinum.
Endurgjald og størri veðhald
Hjálparátøkini hava við sær, at sjálvstøðug vinnurekandi fáa endurgjald fyri minkandi umsetning og fastar útreiðslur.
Fyrtøkur fáa størri útflutningskreditt, og almenna veðhaldsupphæddin fyri lán, sum fyritøkur taka, hækkar.
Ferðatryggingargrunnurin, Rejsegarantifonden, fær almenna trygd fyri 1,5 milliardum krónum, til tess at hjálpa fyritøkum í ferðavinnuni
Krøvini um at fáa dagpening og sjúkradagpening linka, og næmingar og lesandi, sum eru í vanda fyri at missa arbeiðið, fáa betri lánsmøguleikar.
Avtalan gjørd í nátt
Samráðst hevur verið á Christiansborg í alla nátt um hjálparpakkan, eftir at stjórnin í gjár legði fram sítt uppskot um hjálparátøk.
Vinstriflokkurin, Radikali flokkurin og Danski fólkaflokkutin mæltu til at stovna ein hjálpargrunn við 300 milliardum krónum, men eingin avtala er gjørd um at stovna hjálpargrunn.