Partarnir hugsa um støðuna

Semingsstovnurin sendi um níggjutíðina í gjárkvøldið samráðingarfólkini hjá teimum trimum manningarfeløgunum og Reiðarafelagnum til hús at umhugsa støðuna.

Partarnir hittast so aftur í morgin.

Semingsroyndin byrjaði á middegi týsdagin. Men tað er langt frá einum semingsuppskoti, sigur Terje Sigurðsson, semingsmaður.   

Semingsstovnurin hevur longt sáttmálarnar til á midnátt annað hvítusunnukvøld, mánakvøldið 1. juni. Sáttmálarnir fóru úr gildi 1. apríl, men eru longdir nakrar ferðir síðani tá.

Arbeiðarafeløg og arbeiðsgevarar

Seinnapartin týsdagin slitnaðu samráðingarnar millum tey fimm arbeiðarafeløgini og Føroya arbeiðsgevarafelag. 

Semingsstovnurin og partarnir samdust um at leingja sáttmálarnar til hósdagin 4. juni á midnátt.

Semingsstovnurin og feløgini hittast í dag at leggja semingsroyndina til rættis.