Ósemja um broyttar leigutreytir

Tórshavnar kommuna og byggifelagið Articon eru ósamd um eitt leigumál á havnarlagnum á Sundi.

Articon ætlar at leiga 3.800 fermetrar til tíggju sementsiloir.

Articon leigar frammanundan á Sundi. Leiguavtala varð gjørd í 2014 um 4.000 fermetrar.

Sama árið komu 6.000 fermetrar afturat, og ein 25 ára leigusáttmáli varð gjørdur.

2.000 fermetrar komu afturat í 2016.

15.800 fermetrar

Og nú vil Articon leiga 3.800 fermetrar.

Men kommunan fyrireikar nú nýggjar reglur um leigu.

Hesa mannagongdina góðtekur Artcon ikki.

Articon sigur, at í høvuðssáttmálanum eru gjaldstreytirnar ásettar.

Alt í senn

Skal nakað broytast, eigur tað at verða gjørt mótvegis øllum, sum leiga á havnarløgunum í kommununi, samstundis.

Tað ber ikki til at taka ein og ein sáttmála, tá hann skal broytast.

Men kommunan heldur fast við sítt.

Orðini í nýggja leigusáttmálanum, sum Articon ikki vil skriva undir, eru ein kunning um ein broyting, sum er á veg, og ikki ein broyting, sigur havnarmeistarin.  

Býráðið skuldi viðgera málið hóskvøldið.

Men Bogi Andreasen, formaður í Vinnunevndini, vildi hava málið aftur í Vinnunevndina, og tað varð einmælt samtykt.