Sara Omar tosar um sínar skaldsøgur

Rithøvundurin Sara Omar er komin til Føroya at tosa um skaldsøgur sínar Dødevaskeren, sum kom í 2017, og Skyggedanseren, sum kom í fjør.
 
Tvey tiltøk við Saru Omar vera í Norðurlandahúsinum í morgin.

Fyrra tiltakið er klokkan eitt og tað seinna klokkan fýra seinnapartin.

Sara Omar fer í samrøðu við Óluvu Zachariasen at siga frá skaldsøgunum og stríðnum fyri rættindunum hjá kvinnum.

Elvt til kjak

Skaldsøgurnar hjá Sara Omar hava elvt til nógv kjak, serliga tí tær viðgera so viðkvom evni sum kvinnukúgan, blóðskemd, pedofili, harðskap móti kvinnum og børnum, og hvussu mentan, religión og samfelagsskipanir ávirka lívsmøguleikarnar hjá kvinnum og gentum. 

Skaldsøgurnar byggja á veruligar hendingar.

Sara Omar hevur fingið nógvar virðislønir og heiðurslønir fyri skriving sína. 

Kvinnufelagið í Havn, Norðurlandahúsið og Amnesty Føroyar hava fingið Saru Omar til Føroya.