Helgi svarar Johan um SEV og grøna orku

Í dag fer Helgi Abrahamsen, landsstýrismaður, at svara fyrsta og higartil einasta skrivliga fyrispurninginum í hesari tingsetuni.

Johan Dahl í Sambandsflokkinum spurdi fyri einum góðum mánaði síðani um streym, netið hjá Sev og grøna orku.

Johan Dahl hevur seks spurningar í fyrispurninginum.

Hann spyr millum annað, um Helgi Abrahamsen veit um streymprísirnar í Danmark, har sum framleiðsla og net eru skild sundur, og ein liberalisering er gjørd.

Johan Dahl sigur, at hann spyr, so sjónarmiðini hjá fleiri viðkomandi pørtum kunnu koma við í arbeiðinum hjá landsstýrismanninum við einari nýggjari skipan á elorkuøkinum.

Á tingfundinum, sum verður í dag kl.13.00, fer tingið endaliga at samtykkja og avgreiða tingmálini um ókeypis sálarfrøðiliga viðgerð til fólk millum 15 og 35 ár, sum hava angist ella lætt til moderat tunglyndi og um at útseta javningina í almannaveitingum í eitt ár.