Lítil upsafiskiskapur í løtuni

Trolararnir, sum royna eftir upsa, fáa lítið í løtuni, upplýsir Fiskamarknaðurin.

Seks pør eru til fiskarí. Tveir djúpvatnstrolarar eru vestanfyri, og teir fiska kongafisk.

Trolbátarnir eru allir inni.

Um línuskipini sigur Fiskamarknaðurin, at eitt er á Íslandsrygginum og tvey á landgrunninum. Tey fiska tosk, hýsu, longu og brosmu.

Streymurin batnar

Um útróðurin verður sagt, at streymurin batnar sum vikan gongur, men veðrið verður einki serligt.

Tvey garnaskip fiska svartkalva og eitt fiskar havtasku.

Tey, sum fiska svartkalva, hava smáligan fiskiskap. Tað, sum fiskar havtasku, hevur brúkiligan fiskiskap, skrivar Fiskamarknaðurin.