Leingja undantøkini eitt samdøgur aftrat

Felagið Føroyskir sjúkrarøktarfrøðingar hevur longt undantøkini, til klokkan trý seinnapartin í morgin.

Tað er tað einasta, sum Óluva í Gong, forkvinna í felagnum, fæst at siga. Hon vil ikki greiða nærri frá avgerðini í løtuni.

Seinnapartin í gjár góvust semingsmenninir at fáa sjúkrarøktarfrøðingarnar og Lønardeildina í Fíggjarmálaráðnum at semjast um nýggjan sáttmála.

Semingsstovnurin ger ikki meira, uttan so at partarnir heita á Semingsstovnin um at koma upp í aftur samráðingarnar, segði Terje Sigurðsson, semingsmaður.

Ikki grundarlag at halda fram

Hann vildi ikki nágreina orsøkina til at teir góvust, men segði, at tveir partar skulu til fyri at semjast.

Semingsmenninir góvu pørtunum ymsar orðingar í einum møguligum sáttmála týskvøldið, sum partarnir skuldu svara á middegi í gjár.

Men svarið ella svarini góvu ikki grundarlag fyri at leggja nakað semingsuppskot fram, og tí góvust semingsmenninir við royndunum at finna semju millum Lønardeildina og sjúkrarøktarfrøðingarnar.

Jan Mortensen, stjóri á Lønardeildini, sigur, at einki broytt síðani í gjár. Terje Sigurðsson, semingsmaður, sigur í dag, at teir einki hava hoyrt frá pørtunum síðani í gjár.