MARK stevnir kommununa

NN Holding, sum eigur partafelagið MARK, hevur stevnt Tórshavnar kommunu og Kommunala eftirlitinum eftir endurgjaldi, skrivar Vágaportalurin.

Gordon Rajani, stjóri í MARK, váttar fyri Útvarpinum, at so er. Men hann hevur ikki fleiri viðmerkingar um málið.

Byggiætlan skorin niður í helvt

NN Holding fekk loyvi frá kommununi at byggja 96 íbúðir undir Kongavarða. Men grannar klagaðu, og so bleiv byggiætlanin skorin niður í helvt.

Afturfyri gjørdi kommunan avtalu við NN Holding um makaskifti, so at tær 48 íbúðirnar, sum ikki blivu gjørdar undir Kongavarða, kundu byggjast millum Horna í Havn.

Men slíka avtalu kundi kommunan ikki gera, segði Kommunala eftirlitið. Byggiøkið millum Horni varð so boðið út í almennari sølu.