Løgmaður fegnast um friðarligt forsetaskifti í USA

Fólkaræðið sigrar.

Tað sigur Bárður á Steig Nielsen, løgmaður, í eini fráboðan á heimasíðuni hjá Løgmansskrivstovuni í sambandi við tað, sum hendir í USA í løtuni.

Løgmaður fegnast um, at amerikanski forsetin, Donald Trump, sigur seg vilja tryggja eitt friðarligt og skipað stjórnarskifti.

“Tað er gott og rætt, at tað skal bera til at eftirkanna úrslit, og at alt er farið rætt fram. Men tá úrslitið er greitt, so er tíðin komin til at góðtaka tað og fagna fólkaræðinum. Friðarlig og vælskipað stjórnarskifti er helst mest grundleggjandi styrkin í vesturlendska fólkaræðinum,” sigur Bárður á Steig Nielsen, løgmaður.