Ítróttafagnaðurin 2020: Hevur hondbólt í blóðinum

Gurið Krosslá Augustinussen hevur í meir enn 20 ár sett sín týðiliga dám á hondbólt í Føroyum. 

Serliga hevur hon gjørt vart við seg sum kviki og ídni VB-spælarin, sum altíð gekk á odda, bæði á vøllinum og uttanfyri vøllin. 

Nú er hon í uppskoti at gerast ítróttafyrimyndin 2020 - ein av heiðurslønunum, sum Ítróttarsamband Føroya letur á fagnaðinum 13. februar.

 - Eg elski hondbólt og dámi væl at gera okkurt fyri bygdina, og tað føli eg við at hjálpa VB, sum eg geri, sigur Gurið Augustinussen, sum framvegis spælir á besta liðnum hjá barndómsfelagnum og hevur eina ørgrynnu av uppgávum annars í VB.