Fimm umsøkjarar sleppa at fiska svartkjaft

10 umsøkjarar vóru til tey 7800 tonsini, og tilsamans varð søkt um 26.700 tons.

Eftir innanhýsis viðgerð, og í samráð við Havstovuna, vórðu fimm av teimum 10 umsóknunum gingnar á møti, upplýsir Fiskimálaráðið. 

Í viðgerðini og í raðfestingini av umsóknunum er serligur dentur lagdur á menningarvirðið og møguligt nýskapanarvirðið í royndunum, umframt virðisøking av veiðuni, sigur Fiskimálaráðið.

Tær fimm royndarkvoturnar eru millum 800 og 2000 tons hvør.

Á heimasíðuni hjá Fiskimálaráðnum er stutt lýsing av teimum fimm verkætlanunum, sum fáa svartkjaftakvotu til vinnuligar fiskiroyndir í ár.

Tey, sum fáa hesar kvotur, skulu senda Fiskimálaráðnum eina frágreiðing, tá royndirnar eru gjørdar, og í seinasta lagi 31. desember í ár.

Kvotur, ið ikki verða fiskaðar í ár, fella aftur til Fiskimálaráðið á nýggjárinum.