- Tíðindi, mentan og ítróttur
Stjørna fødd í føroyskum ósigri
![](https://kvf.fo/sites/default/files/styles/grein-ovasta-mynd/public/elias_a_skipagotu_mynd.jpg?itok=iX7Ghprp)
Elias á Skipagøtu var flúgvandi og vísti, hvussu nógvur hondbóltur býr í honum, tá Føroyar taptu tepurt við einum máli í undankappingardysti fyri Ukreina.
Stjørnuskotið úr IK Sävehof skeyt heili átta mál í sínum fyrsta A-landsliði, men tað rakk akkurát ikki til meir enn enn eitt tap.
Góð føroysk byrjan
Ukreina legði seg á odda í dystinum, men fagnaðurin var øgiligur, tá Rói Berg Hansen javnaði fyri Føroyar, og so var dysturin veruliga í gongd.
Tórður Guttesen, sum byrjaði inni í málinum, tók trý skot á rað, og so kundi Jónas Djurhuus skjóta tvey í hinum endanum til 3-1.
Tað varð eisini 4-1, men trøini vuksu ikki inn í himmalin, og Ukreina við Vladyslav Dontsov á odda kom sterkt aftur og legði seg á odda 5-4.
So gekk javnt á eina løtu, men Ukreina otaði seg trý mál framum, og Dontsov helt á við sínum dundurskotum.
Sjey dýrir minuttir
Sum hálvleikurin leið, gjørdu føroysku spælararnir ov nógvar villur í álopsspælinum.
Upp á nakrar fáar minuttir tveitti heimaliðið fleiri bóltar burtur, og tað kostaði nógv. Tá góðir 26 minuttir vóru spældir, var ukreinska leiðslan vaksin til 15-9.
Føroyingarnir stríddust hart løtuna fyri steðgin og fingu minkað um munin til 16-11, men allir vóru greiðir yvir, at nógv skuldi til í seinna hálvleiki.
Betri eftir steðgin - Elias flúgvandi
Andrii Akimenko skeyt enn eitt brotskast í málið beint eftir steðgin, og Elias á Skipagøtu, sum fekk sín fyrsta dyst á A-landsliðnum, var óheppin og brendi tvær ferðir á rað í sama álopi.
Peter Krogh skeyt betur og minkaði til 17-12, og beint eftir riggaði hjá Eliasi, sum fyrst snaraði bóltin hegnisliga fram við málverjanum eftir gjøgnumbrot, og síðan skeyt heilt upp í hornið til 18-14.
Nicholas Satchwell, sum kom inn aftur, stongdi málið, og Elias á Skipagøtu spældu seg glóðheitan, og tí tódnaði ukreinska leiðslan spakuliga. Tá eitt korter var spælt av seinna hálvleiki, var munurin bert tvey mál.
Avgerðin
Ungu spælararnir - Hákun West av Teigum og serliga Elias á Skipagøtu - vóru væl spælandi, men sjálvt ikki Elias megnaði at skjóta brotskast í málið, og tí komu Føroyar ikki nærri enn tvey.
Ikki fyrrenn hálvur annar minuttur var eftir at spæla, tá Helgi Hoydal fekk bóltin inn á strikuna og takkaði fyri. Eitt mál á muni.
Tórður Guttesen tók skotið frá ukreinum, tá teir endiliga fingu í lag at skjóta, og so fingu føroyingarnir ein síðsta kjans at javna. Jónas Djurhuus leyp upp og skeyt diagonalt, men málverjin bjargaði, og dómarin, sum kundi havt givið fríkast, lat ikki við seg koma.
Tí endaði tað við triðja tapinum á rað - eitt tap, sum óivað kendist sera beiskt hjá føroysku spælarunum, sum - enn einaferð - vóru so nær við.
Men um metast skal út frá flúgvandi byrjanin hjá Eliasi á Skipagøtu, er eingin ivi um, at eitt stórt úrslit liggur og bíðar føroyingunum.