Kanna um stóru myllurnar dálka drekkivatnið

Spurningurin um vindmyllurnar á Gellingarkletti í Hoyvíkshaganum kunnu dálka drekkivatnið í Havn, varð tikin av skránni fyri býráðsfundin í Havn hósdagin.

Býráðið skuldi taka støðu til eitt uppskot um at broyta serstøku byggisamtyktina fyri vindmyllur í Hoyvíkshaga.

Men nakrar treytir eru.

Tann eina er, at Yvirfriðingarnevndin gevur loyvi. Onnur er, at ljóðviðurskiftini verða kannað. 

Myllurnar vera í einum tilrenningarøki hjá drekkivatni. Kannast skal, um hetta kann ávirka drekkivatnið.

Stórar myllur

Serstaka byggisamtyktin fyri vindmyllur í Hoyvíkshaga er góðkend av Umhvørvis- og vinnumálaráðnum í februar í ár. 

Men síðani er søkt um loyvi til nógv størri myllur. Tað krevur so, at serstaka byggisamtyktin fyri økið verður broytt.

Hæddin á myllunum fer úr 79 metrum upp 92 metrar, og veingjabreiðið fer úr 82 metrum upp í 117 metrar.