Virðisløn fyri burðardygd

Skála skúli fekk veðurlagsvirðislønina hjá Lærarafelagnum í ár.

Hon verður latin í samstarvi við Betri og Føroya náttúru og umhvørvisfelag. 

Í grundgevingini stendur, at Skála skúli hevur skarað framúr í arbeiðinum at geva børnum og ungum áhuga fyri og innlit í veðurlagsavbjóðingar og loysnir á veðurlagsavbjóðingum.

Seinnu árini hevur Skála skúli arbeitt miðvíst fyri, at alt í skúlanum er burðardygt. 

Endurnýta alt

Tey vaksnu hava gingið undan, og næmingarnir hava verið skjótir at tikið við. 

Tey endurnýta mestsum alt, brúka rusk og leivdir, virka burtur úr burðardyggum tilfari, skilja burturkast í fastari skipan, og so taka tey heimini við, so umhvørvisvinarliga tilgongdin røkkur inn í hvørt heim, har skúlabørn eru, stendur í grundgevingini fyri at geva Skála skúla veðurlagsvirðislønina í ár.

Hetta er aðru ferð, virðislønin er latin.

Í fjør vann Eysturskúlin í Havn.