Sjúkrarøktarfrøðingar: FMR brýtur sáttmálan

Tað er brot á sáttmálan millum Felagið føroyskir sjúkrarøktarfrøðingar og Fíggjarmálaráðið, at lýst verður eftir fakligum stjóra til Gigni, sum verður settur í lønarflokk sum leiðari 5.

Og tað er eisini sáttmálabrot at søkja eftir varaleiðara til Gigni at seta í lønarflokk sum leiðari 3.

Hetta eigur Fíggjarmálaráðið at viðurkenna.

Tað sigur felagið hjá sjúkrarøktarfrøðingum í kæruni til Fasta gerðarrætt. 

Kæruritið kom 7. mai.

Lýst fyrr

Starvið sum fakligur stjóri í Gigni er annars lýst leyst eina ferð fyrr. Men felagið hjá sjúkrarøktarfrøðingunum noktaði tá limum sínum at søkja.

Felagið segði, at stjórastarvið var ikki lýst sambært sáttmálanum, sum felagið hevur við Fíggjarmálaráðið.

Lønardeildin hjá Fíggjarmálaráðnum fór í Fasta gerðarrætt og fekk viðhald í, at talan var um óheimilað stríðsstig.

Freistin at søkja tá var 23. apríl. Eingin søkti. Nú er freistin at søkja stjórastarvið á middegi í morgin.

Freistin at søkja varaleiðarastarvið er til 11. juni á middegi.