WHO ávarar: Vandi fyri nýggjari aldu av koronu

Koronasmittan er vaksin við 10 prosentstigum í Evropa seinastu vikuna, og av tí sama økist vandin fyri eini nýggjari aldu av koronu í Evropa.

Tað sigur stjórin hjá WHO í Evropa, Hans Kluge, við BBC.

Hann sigur, at tað gongur heldur seinni enn ætlað at koppseta fólk, og tá nýggj sløg av koronu gera um seg, samstundis sum fólk aftur koma meir saman, er vandin fyri at koronasmittan fer at gera meira um seg, sigur hann.

Og so er stórur vandi fyri, at EM-kappingin í fótbólti fer at gera, at smittan fer at breiða seg skjótari, sigur hann.

Fleiri dømi eru um, at nógv fólk eru smittað bæði í London og í Glasgow, har nakrir dystir eru leiktir, og tað sama ger seg galdandi fyri finsk viðhaldsfólk, sum vóru í Santa Pætursborg í Russlandi.

India boðar frá, at nú eru yvir 400.000 fólk deyð av koronua, tað er bert ein góður mánaði síðani, at uppgerðin vísti, at yvir 300.000 vóru deyð.

Ein uppgerð frá Johns Hopkins universitetinum vísir, at yvir 30 milliónir fólk eru smittað í India. Og tí er India landið har næstflest fólk eru smittað við koronu, vísir uppgerðin.