KÍ fekk mótstøðulið úr Íslandi í meistarakappingini

Breiðablik verður fyrsta mótstøðuliðið hjá kvinnunum úr KÍ í Champions League-kappingini.

Gintra úr Litava og Flora Tallinn úr Estlandi eru eisini í bólki 1 saman við føroyska meistaranum.

Spældar verða hálvfinalur og síðan finala. KÍ skal spæla ímóti íslandska liðnum úr Kópavági í aðrari hálvfinaluni, meðan baltisku grannarnir hittast í hinari. 

Hálvfinalurnar verða spældar 18. august, og finalan er á skránni 21. august. Dystirnir í hvørjari einstakari smákapping verða avgreiddir í sama stað, og liðini skulu avgera sína millum, hvør verður vertur.

Vinnararnir av bólkunum í fyrsta innleiðandi umfarinum spæla seg víðari í 2. umfar, har talan eisini verður um smákappingar. Eftir hetta fer Champions League-bólkaspælið í gongd.