Hevði føroyskt koyrikort, men noyddist at taka koyriroynd í Danmark

Danska Ferðslumálaráðið hevur spurt Løgmálaráðið um føroysk koyrikort.

Tað hendir, eftir at Sjúrður Skaale, fólkatingsmaður, spurdi Benny Engelbrecht, ferðslumálaráðharra, hví donsku koyrikortsmyndugleikarnir ikki hava álit á Akstovuni, sum gevur koyrikort í Føroyum.

Í hesum førinum er talan um ein bilførara í Føroyum, sum misti koyrikortið, men tók tað aftur.

Bilførarin flutti til Danmarkar.

Kravdu koyriroynd í Danmark

Tá hann so skuldi býta føroyska koyrikortið um við eitt danskt, hevði Politiets Administrative Center bara upplýsingar um mista koyrikortið, ikki um, at koyrikortið var tikið av nýggjum.

Kravið í Danmark var tí, at ein koyriroynd skuldi takast har.

Føroyska koyrikort hevur somu rættindi í Danmark sum danska koyrikortið. 

Benny Engelbrecht sigur, at hann hevur spurt Løgmálaráðið, um politiið í Føroyum og politiið í Danmark ikki kunnu geva hvørjum øðrum upplýsingar um koyrikort, eitt nú frádøming.