Herðing í donsku revsilógini ikki galdandi í Føroyum

Herðingin, sum var gjørd um kynslig misbrot í donsku revsilógini í 2016, er ikki galdandi í Føroyum.

Tað hevur Føroya rættur oftari enn eina ferð staðfest. Og nú hevur Eystari landsrættur eisini staðfest tað.

Í einum dómi um eitt neyðtøkumál, sigur Landsrætturin, at herðingin, sum varð gjørd í Danmark, er ikki galdandi í Føroyum.

Tað er hon ikki, tí ein greið politisk fráboðan um at herða revsingina var ikki í Føroyum. Slík fráboðan var í Danmark, sigur Landsrætturin.

Revsilógin yvirtikin

Føroyar hava sína egnu revsilóg, tí málsøkið er yvirtikið.

Í einum øðrum máli um neyðtøku og onnur kynslig misbrot var kravið hjá ákæruvaldinum í Føroya rætti trý ára fongsulsrevsing, um herðingin í donsku revsilógini eisini er í føroysku revsilógini, og tvey ár, um herðingin ikki er í føroysku lógini.

Føroya rættur segði, at herðingin er ikki galdandi í Føroyum.

Hetta málið er eisini farið í Landsrættin, men ikki viðgjørt har enn.