Svenskarar bjóða Føroyum av í dart

Krútsterku svensku landsliðini hjá svenskarum hava bjóðað Føroyum av í dart.

Í samband við altjóða dartkappingina Faroe Islands Open, sum verður í mars, koma svenskarar við sínum best kastandi fólki at spæla venjingardystir ímóti føroyingum.

 - Svøríki er verandi evropameistari hjá monnum, so tað er ikki ein og hvør, sum kemur at møta okkara landsliði. Tað er øgiliga stórt, sigur Kristian Joensen, næstformaður í Dartsambandi Føroya.

 - Hjá kvinnunum hava svenskarar eina, sum eitur Vicky Prium, sum varð heimsmeistari næstseinast, so hetta eru stór nøvn.

McIntosh gleðir seg til nýggjar avbjóðingar

Dartsamband  Føroya fekk altjóða limaskap fyri tveimum árum síðan, men korona legði fót fyri fyrstu royndini at hýsa altjóða kapping.

Nú sær út til at tað fer at eydnast, og fleiri útlendskir spælarar hava melda til.

Suvereni føroyameistarin hjá monnum, Jan McIntosh, gleðir seg at royna seg ímóti sterkari útlendskari mótstøðu.

 - Eg havi roynt meg uttanlands, og tað hevur gingið væl, og tími væl at spæla meir uttanlands, sigur Jan McIntosh.

Faroe Islands Open verður á Glasi 18. til 20. mars.