Samráðast enn um hondbóltsdystin í Ukraina

Tað verður framvegis samrátt um, hvussu verður við hondbóltsdystinum hjá H71 og ukrainska liðnum HC Galyachanka, sum eftir ætlan skuldi spælast í dag.

Talan er um fjórðingsfinaluna í EHF Cup, sum skuldi byrja í dag klokkan 12.

Men H71-kvinnurnar eru framvegis í Póllandi, og mótstøðuliðið er framvegis í Ukraina. Orsøkin er, at danska uttanríkisráðið fríggjadagin heitti á allar danskar ríkisborgarar um at fara úr Ukraina, har støðan er spent í løtuni. Evropeiska hondbóltssamgongan EHF hevur hinvegin sagt, at H71 skal fara til Ukraina at spæla dystin.

Anna Dam, forkvinna í H71, sigur í stuttari viðmerking nú fyrrapartin, at tað er púra greitt, at dysturin verður ikki spældur í dag. 

Hon sigur, at ukrainska liðið hevur sagt seg verða sinnað at koma til Póllands at spæla antin týsdagin ella mikudagin. Men tað er ikki ein haldbær loysn fyri H71, sum í so fall ikki kemur heim aftur fyrr enn hósdagin. Ukrainska liðið hevur eisini skotið upp at spæla báðar dystirnar í Póllandi, men at H71 so skal bera kostnaðin av hesum. Tað er ikki ein loysn, sum H71 kann liva við.

H71 hevur hinvegin skotið upp at spæla fyrra dystin, sum skuldi vera í Lviv í dag, í Warszawa í morgin, og at seinni dysturin so verður í Føroyum sum ætlað sunnudagin 20. februar.

Ein deadline er sett til klokkan 13 føroyska tíð fyri at finna eina loysn, sigur Anna Dam í telefonini úr Póllandi.

Vit frætta meira í tíðindunum klokkan 14.