Føroysk flogbóltslandslið í undankappingum fyri fyrstu ferð

Í mai skriva tvey føroysk flogbóltslandslið søgu, tá tey skulu dystast í sokallaðum CEV EuroVolley-undankappingum.

Talan er um U21-landsliðið við kvinnum og U22-landsliðið við monnum. Hetta er fyrstu ferð, at føroysk flogbóltslandslið eru við í slíkari undankapping til endaspøl, skrivar Flogbóltssambandið.

Kvinnurnar skulu til Eysturríki, har mótstøðuliðini verða Bulgaria, Ísrael og vertstjóðin.

Menninir skuldu eftir ætlan spæla ímóti Bulgaria, Fraklandi og Ungarn, men russiska innrásin í Ukraina hevur gjørt, at bæði Russland og Hvítarussland eru útihýst frá CEV-kappingum, og bólkarnir eru tí skipaðir av nýggjum.

U22-skal í staðin royna seg ímóti Lettlandi og Serbia í Lettlandi. Sum skilst eru øll liðini sterk, men serliga Serbia og Bulgaria teljast ímillum stóru flogbóltstjóðirnar.

Venjaratoymini, Lars Engell og Kristian Mikkelsen hjá kvinnunum og Jens Bang og Suni Hansen hjá monnunum, arbeiða í løtuni við hópunum, sum verða úttiknir í næstum. 

Í august skulu A-landsliðini hjá kvinnum og monnum spæla CEV-undankapping fyri fyrstu ferð.