Putin ætlar sær á G20-toppfund

Russiski forsetin, Vladimir Putin, hevur ætlanir um at møta á G20-toppfundinum, sum Indonesia skipar fyri seinni í ár.

Tað sigur russiska sendifólkið, Lyudmila Vorobieva, sambært Reuters.

Putin boðar frá hesum, hóast fleiri G20-lond, eisini USA, hava sett fram ynski um at útihýsa Russlandi úr bólkinum eftir russisku innrásina í Ukraina.

Í G20-bólkinum eru størstu ídnaðarlondini í heiminum og ES. 

Bólkurin er ein óformligur pallur fyri altjóða búskaparligum samstarvi.

Kina tekur undir við, at Russland kemur við á fundin, skrivar AFP.