Enniberg metstóra rækjulast

Enniberg, sum mest man vera kendur sum ein av flakatrolarunum, ið plagar at royna í Barentshavinum, hevur gjørt ein metgóðan rækjutúr við Svalbard og í Loynikrókinum.

Teir hava fylt skipið og eru farnir at sigla heim, og Enniberg væntast at vera á Havnini mikumorgunin við 917 tonsum av rækjum.

Hetta er størsta rækjulast, sum nakrantíð er landað í Føroyum.

Túrurin byrjaði síðst í mars mánaði, og teir hava roynt eftir rækjum í rusiskjum sjógvi við Svalbard og fyri ein part í altjóða øki í Loynikrókinum.

Við Enniberg henda túrin eru 20 mans og skipari er Karl Danielsen.

Síðani partafelagið Enniberg fyri trimum árum síðani keypti partafelagið Havborg og tilhoyrandi rækjukvotu, hevur Enniberg gjørt ein rækjutúr hvørt summar.