31 børn á bíðilista til frítíðartilboð frá Almannaverkinum

Sólvit E. Nolsø, landsstýrismaður, hevur svarað fyrispurningi frá Eyðgunn Samuelsen, løgtingskvinnu, um frítíðartilboð til børn við serligum tørvi. Hon spurdi, hvussu nógv børn í skúlaaldri frá triðja flokki bíða eftir frítíðartilboði eftir skúlatíð.

Landsstýrismaðurin svarar, at tann 31. mai bíðaðu 31 børn eftir frítíðartilboði frá Almannaverkinum. Fýra teirra hava fingið boðið frítíðartilboð nú eftir summarfrítíðina. Í løtuni viðger Almannaverkið 10 umsóknir um frítíðartilboð.

Afturat hesum hevur Almannaverkið samband við trý ella fýra børn, sum kunnu hugsast at hava brúk fyri frítíðartilboði eftir summarfrítíðina. 

Royndirnar hjá Almannaverkinum vísa, at Almannaverkið eftir skúlabyrjan fær tvær ella tríggjar umsóknir um frítíðartilboð. Eydnast ikki at útvega fleiri tilfrítíðartilboð í summar, fara okkurt um 40 børn at vera á bíðilistanum í september. 

Nýliga varð gjørd avtala millum Mentamálaráðið og skúlan á Trøðni um, at nøkur børn, sum fáa serskúlatilboð og fara í triðja flokk eftir summarfrítíðina, kunnu fáa frítíðartilboðið veitt á skúlanum eftir skúlatíð. Í løtuni fevnir tann avtalan bara um tvey børn. 

Arbeitt verður við at gera seravtalur við tær kommunur, sum hava frítíðartilboð til børn frá triðja flokki. Almannaverkið hevur slíka seravtalu og arbeiðir í løtuni við at fáa avtalu við aðra kommunu.