Funnu 10 kilo av hassji um vikuskiftið

Leygardagin vóru fýra fólk tikin umborð á Norrønu, sum lá í Hirtshals. Tey skuldu til Føroya. 

Tá tey komu til Norrønu, fingu tollararnir illgruna til teirra, tí fjáltur var á teimum.

Politiið var boðsent. Fólkini vóru tikin, og tað vísti seg, at tey høvdu tvey kilo av hassji hvørt, tilsamans átta kilo.

Tá so Norrøna kom á Havnina úr Hirtshals sunnukvøldið vóru trý fólk, ein kvinna og tveir menn, tikin, tí tey royndu at smugla tvey kilo av hassji í land.

Politiið helt ikki, at tey tvey fólkini høvdu nakað við hassjið at gera.

Men hin maðurin var í Føroya rætti í gjár dømdur fýra mánaða fongsul.

Fólkini eru ikki føroysk. Maðurin, sum var dømdur, var latin leysur eftir rættarfundin.

Hann fær boð, tá hann skal inn at sita.

Politiið veit ikki, um nakar í Føroyum skuldi hava hassjið at selja.

Higartil í ár hevur politiið í Føroyum tikið 25 kilo av hassji.