Elin W. Poulsen vald í kringvarpsstýrið sum starvsfólkaumboð

Í fyrru viku segði Carsten M. Arnskov seg frá sum starvsfólkaumboð í kringvarpsstýrinum. Tí boðaði kringvarpsstjórin frá nývali, sum fór fram 14. og 15. september í Sortudíki. Stutt eftir at valið var av, gjørdist greitt, at Elin W. Poulsen átti meirilutan av atkvøðunum og gjørdist sostatt aftur limur í kringvarpsstýrinum. John Johannesen bleiv valdur sum varalimur.

Kringvarpsstýrið er ovasta leiðslan í Kringvarpinum og hevur ábyrgdina av, at stovnurin virkar eftir ásetingunum í Kringvarpslógini og í øðrum fyriskipanum um virksemið á stovninum.

Kringvarpsstýrið verður valt fyri fýra ár í senn. Landsstýrismaðurin í mentamálum velur formann og næstformann. Eftir tilmæli frá politisku flokkunum og starvsfólkunum í Kringvarpinum tilnevnir landsstýrismaðurin í mentamálum hinar fimm stýrislimirnar.

Elin Winther Poulsen

Elin W. Poulsen var forkvinna í kringvarpsstýrinum frá januar 2019 til juni 2022, tá hon legði frá sær, tí hon fór aftur í journalistyrkið. 

John Johannesen, Kringvarp Føroya, miðlafólk

Símun J. Hansen nýggjur formaður

Í juli setti Jenis av Rana, landsstýrismaður í uttanríkis- og mentamálum, Símun Jóannesarson Hansen sum formann í stýrið fyri Kringvarp Føroya, eftir at Elin Winther Poulsen fór frá fyri at vera journalistur í Kringvarpinum.

Nýggi formaðurin er somuleiðis settur restina av hesum setanarskeiðinum, sum endar við árslok.

Stýrið er skipað soleiðis: Símun J. Hansen, formaður, Katrin Petersen, næstforkvinna, Ragnar Joensen, Gunvá við Keldu, Jóhan Petersen, Theodor E.D. Olsen og Elin W. Poulsen, starvsfólkaumboð. 

simun_joannesarson_hansen.jpg

Myndir: Bjarni Árting Rubeksen.