Hallur Hansson úti í eitt ár

Hallur Hansson verður ikki at síggja á fótbóltsvølli aftur fyrrenn um eitt ár. Tað skrivar heimasíðan hjá Fótbóltssambandinum.

 - Hetta vóru tey ringastu boðini, sum eg kundi fáa. Men soleiðis er fótbóltur, og nú ræður um at hyggja fram eftir, og koma styrktur aftur, tá tann tíð kemur, sigur Hallur Hansson við heimasíðuna hjá FSF.

Hann verður sostatt ikki við í landsdystunum ímóti Litava og Turkalandi.

Tað var í dysti fyri íslendska felag sítt, KR Reykjavík, farna sunnudag, at Hallur Hansson mátti av vøllinum á børi.

Skanningarnar vísa nú, at knæið er so mikið skatt, at føroyski liðskiparin neyvan spælir fótbólt aftur fyrr enn um eini níggju til tólv mánaðar.