Fíggjarlógin farin í nevnd

Uppskotið um fíggjarlóg fyri 2023 er nú farið í Fíggjarnevndina.

Fyrsta viðgerð, sum byrjaði fyrrapartin mikudagin, var liðug beint fyri klokkan fimm í gjár.

Á tingfundinum í dag eru uppskotini um eykajáttanarlóg og oljuískoytið á skránni.

Tingfundurin byrjar kl.10.00.

Fíggjarnevndin í Sveis

Herfyri var fíggjarnevndin í Sveis og kunnaði seg um sveisiska búskapin og fíggjarpolitisku viðurskiftini í landinum.

Á ferðini hevði nevndin fundir við fíggjarnevndina í sveisiska tinginum, umboð fyri landspartastjórnirnar og sveisiska stórbankan, Credit Suisse. 

Fundur var eisini við tankasmiðjuna Foraus, ið felagsskapur hjá sveisiskum lesandi, sum millum annað greinar uttanríkisviðurskfti og búskaparviðurskifti.

Bitcoin

Fíggjarnevndin vitjaði eisini norsku sendistovuna og danska konsulátið í Zürich og fyritøkuna Bitcoin Suisse, sum Niklas Nikolajsen von Karlshof, sum er av føroyskari ætt, stovnaði í Zug í 2013.

Fyritøkan er heimsins størsti pallur fyri handil við krypto-gjaldoyra.

Fíggjarnevndin sigur, at ferðin fekk nevndarlimirnar at hugsa um, hvussu til ber at skipa seg á ein øðrvísi hátt, enn vit gera í Føroyum.