Putin er sinnaður at hitta Biden

Russiski uttanríkisráðharrin, Sergei Lavrov, finst í røðu í almenna russiska sjónvarpinum hvassliga at USA.

Hann skuldsetur USA fyri at vera partur av krígnum í Ukraina.

- Satt at siga, tykist tað sum um amerikanarar hava verið við í hesum krígnum leingi, sigur Lavrov.

Sambært Reuters, sigur Lavrov, at russiski forsetin, Vladimir Putin, er sinnaður at hitta amerikanska forsetan, Joe Biden, um USA biður um tað á næsta G20-toppfundinum.

- Skjýtur USA upp at hava fund millum Putin og Biden, fara vit at umhugsa tað, sigur russiski uttanríkisráðharrin.

Hann leggur samstundis USA undir at siga ósatt.

- USA sigur, at tey eru til reiðar samráðast við Russland, men tað er ósatt. Vit hava ongan ítøkiligan fyrispurning fingið um samskifti, sigur Sergei Lavrov.

facebook.jpg

Facebook og Instragram á yvirgangslista

Russiskir myndugleikar hava sett fyritøkuna Meta, sum er móðurfelagið hjá Facebook og Instagram, á ein lista, har yvirgangsfelagsskapir og víðgongdir felagsskapir verða skrásettir. 

Tað skrivar tíðindastovan Reuters, sum vísir til russiska tjóðarmiðilin Interfax. 

Sambært Interfax, hevur russiski felagsskapurin fyri yvirvøku eisini sett Meta á listan yvir yvirgangsfelagsskapir og víðgongdar felagsskapir.