Boris Johnson stillar ikki upp

Fyrrverandi bretski forsætisráðharrin, Boris Johnson, boðar nú frá, at hann stillar ikki upp til formansvalið í Konservativa flokkinum í Bretlandi.

Boðini koma eftir áhaldandi slatur um, at Boris Johnson aftur fór eftir hægsta, politiska embætinum í Stórabretlandi, skrivar Ritzau.

Í fráboðanini sigur Boris Johnson, at hann er ovfarin av, hvussu nógv hava heitt á seg um aftur at taka við formanssessinum í Konservativa flokkinum og sostatt eisini sessinum sum forsætisráðharri.

- Men, seinastu dagarnar eri eg komin til ta niðurstøðu, at tað ikki hevði verið tað rætta at gera.

- Tú kanst ikki leiða munagott, uttan at tú hevur ein samlaðan flokk aftan fyri teg, sigur Boris Johnson í fráboðanini.

Sunak stevnir eftir formanssessinum

Kappingin um formanssessin í Stórabretlandi byrjaði hósdagin, tá ið sitandi forsætisráðharrin, Liz Truss, boðaði frá, at hon leggur frá sær eftir bara 45 samdøgur í embætinum.

Í gjár boðaði fyrrverandi ráðharrin í fíggjarmálum, Rishi Sunak, frá, at hann stillar upp, og fleiri halda, at hann fer at taka við eftir Liz Truss.

Í dag klokkan trý skulu øll valevni hava stuðul frá minst 100 konservativum parlamentslimum, skulu tey framvegis vera við í valstríðnum.

Fyribils bendir alt á, at fyrrverandi ráðharrin í fíggjarmálum fær stuðul frá minst 100 parlamentslimum, og at hann sostatt stevnir móti formanssessinum.